АРЫЗ  

Арыз – жеке адам, жамаат, мекеме, уюм  тарабынан зарыл болгон тарапка мекеменин жетекчисине, белгилүү бир адамга сураныч, сунуш, арыздануу маанисинде жазылган иш кагазы.

Арыз-сураныч, сунуш, арыздануу, ж.б. мазмунунда жазылат. Адамдын жашоо, иштөө процессинде ар кандай кырдаалдарга байланыштуу арызды түрдүү мазмунда жазууга туура келет. Ошого байланыштуу арыздын бир нече түрлөрү колдонулат. 

Арыздын  кайсы түр экендигине  карабай жалпысынан төмөндөгүдөй маалымдаректер (реквизиттер) колдонулат:

1-маалым даректе мекеменин аталышы, жетекчинин кызматы жана аты-жөнү жазылат. Жетекчинин аты жана атасынын аты кыскартылып, фамилиядан мурда жазылат. Фамилиясы барыш жөндөмөдө толугу менен жазылат.  Мисалы, У.О. Осмонбековага 

Жетекчинин аты-жөнүнөн  мурда  илимий   даражасы, наамы берилет. Мисалы, филология илимдеринин доктору, профессор А.М. Молдокановго

2-маалым даректе арыздануучунун кайсы жерде, ким болуп иштери, же кайда жашары,  аты, атасынын аты кыскартылып же толук атооч жөндөмөдө  фамилиясы чыгыш жөндөмөдө толук жазылат. Мисалы,  Аалы Молдоканович  Молдокановдон же А. М. Молдокановдон

3-маалым даректе иш кагазынын аталышы  тексттин ортосуна  баш тамга менен жазылат: (Арыз)

4-маалым дарек тексттин мазмунуна коюлуучу талаптарды өзүнө камтыйт.


Текстте арыздануучунун ою расмий стилде так, кыска, түшүнүктүү жазылат.  Арыздын тексттинде улам башка ойго өткөн сайын абзацтан жазылууга тийиш.

5-маалым даректе  арызга далил катары же керектөөгө ылайык ар кандай иш кагаздарынын  көчүрмөлөрү  тиркелет. Арыздын текстинин аягына абзацтан «Тиркеме» деген термин менен номурланып тиркеменин канча бет экендиги жазылат.

6-маалым даректе арыз жазылган айы, күнү, жылы алты сан менен же сан, сөз менен жазылат: 04.02.12 же 2012-жылдын 4-февралы.

7-маалым даректе арыздануучунун колу коюлат.

8-маалым даректе арыздануучунун аты жана фамилиясы көрсөтүлөт.

9-маалым даректе мекеменин айрым тиешелүү кызматкерлеринин арыз менен таанышкандыгы жөнүндө, арыздын текстинин мазмунуна карата пикирлерин туюнткан кол белги  коюлушу мүмкүн.

10-маалым даректе арыздын индекси белгиленет. Ал каттоо журналына  түшүрүлөт жана ал белги  аркылуу  арыздын текстинде козголгон маселенин ишке ашырылышы көзөмөлдөнөт.

Маалым даректердин аралыгы бири-биринен даана айырмаланып турушу керек. Жетекчинин резолюциясы барактын жогорку сол жак бурчундагы бош орунга коюлат.         

Арыздын төмөндөгүдөй түрлөрү болот:

Жумушка кирүү арызы


Жарандар кызматка же жумушка кирүүдө мекеменин жетекчисинин атына жазылат.

                                                       Кыргыз Республикасынын

                                                        Президентине караштуу

                                                        Мамлекеттик тил боюнча

                                                        улуттук комиссиянын 

                                                        төрагасы Р. М. Момбековго

                                                        Аламүдүн-1 кичи районунун

                                                        №64 үйдүн 7-батирини

                                                        тургуну Бирназарова

                                                        Гүлмира Аликовнадан

 

АРЫЗ

 

    Мени Кыргыз Республикасынын Президентине караштуу Мамлекеттик тил боюнча улуттук комиссиянын Иш кагаздары, кадрлар жана уюштуруу иштери бөлүмүнүн башчылыгына кызматка кабыл алууӊузду өтүнөм.

     Тиркеме: Дипломдун көчүрмөсү (6 бет)

                                                                            (колу)

                                                                            09.02.2012 

Өтүнүч арызы

                                                         Кыргыз Республикасынын

                                                         Президентинин Аппаратынын

                                                         жетекчиси Э.С. Каптагаевге

                                                         Кыргыз Республикасынын

                                                         Президентинин Аппаратынын

                                                         сот  органдары бөлүмүнүн

                                                          башчысы,

                                                          Бишкек шаарынын «Чыгыш-5»

                                                          кичи районундагы 12-үйдүн

                                                          44-батиринин жашоочусу

                                                           К. А. Дүйшеевден

                                         

                                                    АРЫЗ

 

    Мага Чүй облусунун Жайыл райондук сотунун ишин текшерүү үчүн, иштин зарылдыгына байланыштуу 2011-жылдын 8-октябрынан 19-октябрына чейин  иш сапарга барууга уруксат этүүӊүздү өтүнөм.

                                                                            (колу)

                                                                            05.10.2011

Эмгек өргүү арызы


Эмгек өргүү арыздары – кызматкерлер эмгек, декреттик, кезексиз өргүүлөргө чыкканда, кызматына кайра киргенде жазылат.

                                       Кыргыз Республикасынын Мамлекеттик

                                       интеллектуалдык менчик кызматынын

                                       директору А. Калмаматовго

                                       изилдөө бөлүмүнүн серепчиси

                                       Ш. К. Айылчиевден

 

АРЫЗ

 

    Мага ден соолугумду чыӊдоого байланыштуу 2011-жылдын 1-мартынан 15-мартына чейин кезексиз эмгек өргүү берүүӊүздү суранам.

    Тиркеме:  1. Дарт аныктаманын көчүрмөсү (1 бет)

                                 

                                                                                                (колу)

                                                                                             28.02.2012 

Эмгек өргүүсүнөн кайтуу арызы


Кызматкерлер эмгек өргүүсүнөн кайра кызматка киришүү үчүн жазылуучу иш кагазы 

                                                       Кыргыз-Орус Славян

                                                        университетинин ректору,

                                                        академик В. И. Нефадьевге

                                                        кыргыз тили кафедрасынын

                                                        доценти Г. А. Васильковадан

 

АРЫЗ

 

         Мени эмгек өргүүсүнөн кийин 2011- 2012-окуу жылынын 1-сентябрынан баштап өз кызматына киришти деп эсептөөӊүздү суранам.

                                                                                 (колу)

                                                                                23.09.2012 

Которулуу арызы


Кызматкерлер кызматтык абалынан өзгөрүүгө дуушар болгондо, мекемеден башка мекемеге которулганда ж.б. себептерде жазылуучу иш кагазы.

                                                            Кыргыз Республикасынын

                                                            мамлекеттик

                                                            Бажы кызматынын

                                                            төрагасы К.Кулматовго

                                                            улук инспектор                                                             У.Усманжановдон


АРЫЗ

 

   Менин Сизге кайрылуумдун себеби: ваканттык кызмат оруну бар болгонуна байланыштуу мени контрабандалык башкы башкармалыктын башкы адис кызматына которууӊузду суранамын.

    Тиркеме: Жогорку билим жөнүндөгү дипломдун көчүрмөсү (6 бет)

 

 

                      09.11.2011.                         (колу)

Топтук арыз


Жогорку органдарга, жергиликтүү бийликке, айылдык кеӊешке, айыл өкмөтүнө айрым учурда көпчүлүктүн атынан суроо, өтүнүч,  доо түрүндө арыз жазылат

                                                            Бүткүл Дүйнөүк

                                                            Мусулман Жаштары

                                                            Ассамблеясынын президенти

                                                            мырза Саид Баюмиге

                                                            Чүй областынын Таш-Дөбө

                                                            айылындагы кургак учукка

                                                            каршы бейтапканасынын

                                                            дарылануучуларынан


АРЫЗ

 

         Биздин ооруканада жүзгө жакын бейтаптар кургак учук дарты боюнча дарыланып жатат. Булардын 30га жакыны өспүрүм курактагылар. Оорудан сакаюу үчүн күчтүү дары-дармек жана кубаттуу тамак-аш керектелет. Бирок биздин бейтапканага мамлекет тарабынан жогорудагы талаптарды аткарып, аларды камсыз кылууга ылайык каражат бөлүнгөн жок. Бир күнгө болгону 60 сом бөлүнгөн.

      Сизди элибиз журтубуздун  эртеӊки келечегин ойлогон, мекенчил жигити катары   тааныйт. Бул көйгөйгө сиздин көмөк көрсөтүүӊүзгө ишенебиз.


    Арыз ээлери:

        Арызды жеке адамдар гана жазбастан, мекеме, уюмдар да жазат мындай арыздар жеке киши жазган арыздан айырмаланып, жоопко тартуу, доо койгон мазмунда болушу мүмкүн.

    Кызмат арыздары, адатта, атайын иш кагаздарына жазылат. Эгерде мекеменин андай иш кагазына жазылбаса, андай кызмат арызына штамп (төрт бурчтуу мөөр) коюлат.

Доо арызы

Бул арыз башка бир мекемеден же уюмдан тиешелүү товарын, мал-мүлкүн өндүрүп берүү жөнүндө сотторго жазылат.

            Уюмдар арасында түзүлгөн келишим боюнча  экинчи тараптын эскертүүсү жоопсуз калтырылса, же ал толук канаттандырылбаган учурда да доо арызы жазылат.

            Мындай доо арыздарынын адаттагы арыздардан мазмуну башкачараак болот. Доо арызынын негизги маалым даректери төмөнкүлөр:

1.      Кайрылган мекеменин аты, иштин түзүлгөн убагы жана катар номуру көрсөтүлгөн штамп;

2.      Соттун дареги же мамлекеттик мекеменин аты (барактын жарымынан баштап, оӊ жагына жазылат);

3.      Доогердин толук аталышы жана дареги;

4.      Жоопкердин толук аталышы жана дареги;

5.      Доонун суммасы;

6.      Документтин аталышы (доо арызы)

7.      Доо арызынын мазмуну. Текстте доогер эмненин негизинде доо коюп  жаткандыгын, жоопкердин эскерткен кайрылуусуна берилген жоопту канааттандырбагандыгы, келишимди аткарууга жоопкердин туура эмес мамилеси толук, далил аркылуу так көрсөтүлүшү зарыл;

Тиркеме, аткарылган иш кагаздары

                                                    Кыргыз Республикасынын

                                                    Жогорку Сотуна

 

                                                    Доочу: Бишкек шаарынын                                                                    Жибек Жолу көчөсүнүн

                                                   №15 үйүнүн тургуну

                                                   Мамакеева Замира                                                                                  Токторбековна

 

                                                    Жоопкер: Бишкек шаарынын

                                                    Жибек Жолу көчөсүнүн

                                                    17-үйүнүн тургуну 

                                                    Садыбакасова                                    

                                                    Калыйпа Шаршеновна

 

ДОО АРЫЗЫ

 

         Мен, Мамакеева Замира Токторбековна, 18 жылдан бери Садыбакасова Калыйпа менен коңшу жашаймын. 1994-жылдын 30-августунда чыккан Кыргыз Республикасынын мамлекеттик каттоонун чечиминде көрсөтүлгөн мага тиешелүү жер тилкенин 1 (бир) сотка жер тилкесин К. Садыбакасова кошо тосуп алган. Бул боюнча айыл өкмөтү тарабынан түзүлгөн комиссия акт түзгөн.

    Мага тиешелүү жер тилкени бөлүп берүүнү коңшум Садыбакасова Калыя аткарбай койду.

        Кыргыз Республикасынын Жогорку Сотунан ушул маселени туура чечип берүүнү суранам.


Тиркеме:

        1. Айыл өкмөтү тарабынан түзүлгөн комиссиянын акты;

        2. Жер тилкесинин  фотосүрөтү.

 

                                                                    Колу

                                                                    03.03.2012

Эсептешүү арызы

  Бул арыз аткарылган иштерге тиешелүү же оозеки макулдашуунун негизинде бүткөрүлгөн жумушка эмгек акы төлөп берүү жөнүндө жазылат:

  Бүткөрүлгөн ишти мекемеде түзүлгөн комиссия карап чыгып, иштин бүткөрүлүшү жана сапаты жөнүндө көрсөтмө берет. Ал эми эсеп-кысап бөлүмү (бухгалтерия) комиссиянын актысында көрсөтүлгөн эмгек акысын төлөп бериши керек.

     Эсептешүү арызы эркин жазылат, ошентсе да анда төмөнкүлөр көрсөтүлүшү керек.

1. Арыз жөнөтүлгөн мекеменин аты, жетекчинин кызматы, аты, жөнү;

2. Арыз жазуучунун маалыматы (дареги, паспорт номуру, ким тарабынан жана качан берилгени, ысымы, атасынын аты жана фамилиясы, туулган жылы);

3.  Иш кагаздын аталышы (Эсептешүү арызы);

4.  Арыздын тексти.

    Арыз берилген убагы, колу, арыз ээсинин аты, жөнү.

                                    Кыргыз Республикасынын Улуттук

                                    илимдер  академиясынын

                                    Тил илими институтунун

                                    директору, академик А.А.Акматалиевге

 

                                    “Принт Модель” чакан ишканасынын

                                    директору Адамаалы кызы Гүлмирадан

 

                                    (паспорт АN678943, Бишкек шаары,

                                    Октябрь району берилген күнү 10.10.2003

                                    берген орган МКК 50-04)

 

 

АРЫЗ

 

      2011-жылдын 6-сентябрындагы Сиз менен түзүлгөн келишимге ылайык, Тил илими институтуна 50 басма табак китеп чыгарып берүү милдеттенмесин алуу менен келишим түзүлгөн. Китептер чыгарылды жана институтка  жеткирилди. Келишимде көрсөтүлгөн кызматка ылайык 110 000 (бир жүз он миң) сом өлчөмүндөгү акы төлөп беришиңизди өтүнөм.

                                                                       (колу)                                                                                                           15.12.2011